選戰結束  曾俊華稱要真正hea吓：有緣江湖再見

特首選戰以來一直維持高民望、選舉工程打了漂亮的一仗的曾俊華，縱然周日(26日)以365票落敗，但不少市民對他仍依依不捨，甚至希望他繼續在政界打滾，但他笑言不做Regina 2.0，不會參與立法會補選。他今日亦在競選時跟傳媒聯絡的WhatsApp群組，以錄音道別，除了多謝傳媒陪他「Run」了60多天，給他難忘的回憶外，亦透露自己「唔理三七二十一」，要真正hea吓休息，並稱：「大家有緣，江湖再見」。

至於擔任林鄭月娥競選辦傳媒聯絡人、前港台副廣播處長戴健文下午亦表示，跟傳媒的Whatsapp群組將於今晚12時結束。

曾俊華跟傳媒錄音道別內容如下：

各位傳媒朋友：

1月19日我一句「TO RUN」就辛苦晒大家，尤其是攝影大佬、CAM MAN，佢哋真係陪我喺街RUN咗60幾日，文字記者又喺KEYBOARD RUN咗數以萬計字數的報道。我睇返啲相、電視畫面，聽返、讀返啲報道，感受好深，真係好多謝大家留俾我難忘的回憶。

隨著選戰落幕，我而家要講一句「to hea or not to hea」，that is not really a question，我諗我都會接受網民的提議，唔理三七二十一，先休息一段時間，同屋企人輕輕鬆鬆咁享受下生活，真真正正咁hea吓，可能行下太平山，可能行下獅子山，所以我在此祝各位傳媒朋友，工作順利、生活愉快，大家有緣，江湖再見，呢個Whatsapp群組亦就此結束，byebye！